Bakıda 5-ci Xəzər Su İnnovasiya Forumu keçirildi

Bakıda su təsərrüfatı və innovativ texnologiyalar sahəsində regionun ən önəmli tədbirlərindən biri olan 5-ci Xəzər Su İnnovasiya Forumu uğurla təşkil olundu. Forum 12 sentyabr 2025-ci il tarixində, "Bakı Su Həftəsi" çərçivəsində təşkil edilmişdir. Tədbir Xəzəryanı ölkələrdən, Avropa və Asiya regionlarından çoxsaylı beynəlxalq ekspertləri, su siyasəti üzrə mütəxəssisləri, dövlət qurumlarının nümayəndələrini və özəl sektorun liderlərini bir araya gətirdi.

Bu ilki Forumun əsas mövzusu su ehtiyatlarının idarə edilməsində innovativ həllərin tətbiqi, rəqəmsallaşmanın rolu, sənaye və kommunal sektor üçün dayanıqlı texnologiyaların inkişafı, həmçinin region ölkələri arasında əməkdaşlığın gücləndirilməsi oldu. Beynəlxalq mütəxəssislər iqlim dəyişikliyinin su resurslarına təsiri, yeni nəsil təmizləmə və monitorinq sistemləri, su təhlükəsizliyi və ekoloji dayanıqlıq kimi mövzularda müzakirələr apardılar.

Foruma Azərbaycanın bir sıra dövlət qurumları yüksək səviyyəli dəstək göstərdi. Xüsusilə Azərbaycan Dövlət Su Ehtiyatları Agentliyinin iştirakı tədbirin strateji əhəmiyyətini daha da artırdı. Agentliyin rəhbərliyi çıxışlarında ölkəmizdə həyata keçirilən genişmiqyaslı su layihələrindən, rəqəmsal idarəetmə sistemlərinin tətbiqindən və su ehtiyatlarının səmərəli qorunması istiqamətində görülən işlərbəhs etdilər. Dövlət qurumlarının aktiv iştirakı Forumun ölkə üçün prioritet sahələrdən birinə çevrildiyini göstərdi.

Tədbirin təşkilatçısı olan Aqualink MMC, su mühəndisliyi və dayanıqlı su texnologiyaları sahəsində ölkəmizin aparıcı şirkətlərindən biridir. Aqualink uzun illərdir ki, sənaye, kənd təsərrüfatı və kommunal sektor üçün qabaqcıl su təmizləmə, tullantı su idarəetməsi, nasos və filtrasiya sistemləri kimi mühüm layihələri uğurla həyata keçirir. Forumun yüksək səviyyədə keçirilməsi də şirkətin beynəlxalq partnyorlarla əlaqələrinin genişliyini və sektorda etibarlı təşkilatçı kimi nüfuzunu bir daha təsdiq etdi.

Bu ilki Xəzər Su İnnovasiya Forumu bölgədə su sektorunun inkişafına töhfə vermək, yeni əməkdaşlıq imkanları yaratmaq və gələcək nəsillər üçün dayanıqlı su mühitinin formalaşdırılması məqsədlərinə xidmət etdi. Mütəxəssislərin fikrincə, Forumun nəticələri həm Azərbaycanda, həm də Xəzəryanı ölkələrdə su idarəetməsinə dair gələcək strategiyalara əhəmiyyətli təsir göstərəcək.

5-ci Xəzər Su İnnovasiya Forumu bir daha sübut etdi ki, Bakı regionda innovativ su həllərinin müzakirəsi və inkişafı üçün beynəlxalq platformanın mərkəzinə çevrilməkdədir.